Anti lei antitabaco (eu non fumo)

  Teño un negocio de hostalería, vaia case podo dicir, tiña. Pois haberá que pechar as portas. O día dous de xaneiro quitei todos os cinceiros do meu local. Todos menos un. O máis grande deixeino. O máis grande é o chan. E podo quitalo tranquilamente, pois non se usa. Agora os meus camareiros terán menos probabilidades de morrer de cancro, pero terán moitas máis probabilidades de morrer de fame.

  Entre que non se pode fumar nos bares e o ministro Sebastián di que con non tomar un café ao día xa se soluciona a suba da luz, pois iso, no meu chan non entra nin un can.

  O outro día paseando co meu fillo pola miña vila, decateime do porqué da enormidade das beirarrúas do Plan E. Son para a xente que pide esmola (cada día hai máis) e mais para os fumadores. Pero aínda queda espazo. Non me estrañaría que quitaran unha lei en contra de comer colesterol nos bares e nos restaurantes. Que teñamos que comer os bocadillos de tortilla e de chourizo tamén nas beirarrúas. Despois destes razoamentos, o meu fillo díxome: "Que fan estes señores botando fume na beirarrúa? Están cabreados?" E eu contesteille: "Non meu rei, agora é moito máis san fumar fóra". E el: "Eu cando sexa grande, tamén quero fumar fóra, papi, pois é máis san". E eu anonadado díxenlle: "A ver se chegamos a grandes,  meu rei!, porque a hostalería non dá". Ao que me dixo: "Papi, por que non fas unha fábrica de beirarrúas enormes, de cinceiros para o exterior e de estufas tamén para o exterior?" E eu contesteille abraiado: "Se chegas a grande, non te metas a político, pois non triunfarías". "Por que, Papi?" "Porque tes moita cabeciña, meu rei".