Unha señora foi ao médico:
- Doutor, cada vez que tomo un café sinto unha punzada nun ollo!
- Probou a quitar a culleriña da cunca?
Quitando a culleriña o café é un gran estimulante. Eu mentres non tomo o café non son ninguén. Adoito tomalo canto antes. O sr. Cerciello, o meu xefe en Nápoles, tamén se espertaba cun café. Aínda que ao principio costoulle. Cando empecei a traballar alí, díxome:
- Ás sete da mañá espértame cun café expreso sen azucre. O primeiro día esperteino e deixeillo enriba da mesiña de noite. Cando fun arranxar o cuarto, o café estaba intacto.
Ao outro día igual. Despois de varios días decidín pórlle unha cullerada de azucre. Tomou a metade e así pouco a pouco fun facendo que tomase o café. Sete culleradas lle botaba!! Había que ver aquela cunca o limpa que estaba!!
As excelencias do café empezaron na Idade Media en Abisinia, no corno de África. Un pastor viu como a súa cabra colleu enerxía e púxose a saltar e a brincar como unha cabra despois de comer unhas bagas dunha pranta. Comeunas el tamén, e tamén recobrou vigor. Levou aquelas bagas a un mosteiro e os monxes non lle fixeron caso, e tiráronas no lume, e as bagas desprenderon un agradable aroma. Foi así que empezou a historia do café.
O café é moi beneficioso para a saúde:
- Aumenta a memoria.
- Prevén a depresión.
- Axuda a perder peso.
- Reduce a posibilidade de diabete nun 50%.
- Aumenta a enerxía e fortalece a resistencia.
- Prevén o párkinson.
- Impide a gota.
- Ten máis antioxidantes ca ningún vexetal.
- Prevén o cancro de mama.
- Reduce o risco de cancro de próstata.
Xa vedes! Con dous ou tres cafés ao día e un pouco de alegría aumentaredes a vosa calidade de vida.
E como mostra, un botón. Este día fun tomar un café ao meu bar de costume, e había un camareiro novo:
- Posme un cortado.
O camareiro colleu un coitelo e púxoo debaixo do chorro do café.
-Aquí ten.
Rímonos e díxenlle.
- Ti es dos meus!!
