Era visto...Evaristo

  Eu non son de meterme moito en política nin cos políticos. Pero cando se me ocorre algo fago unha viñeta ou unha frase e mándoa ao Facebook.

  Unhas veces métome con Feijoo, outras con Zapatero, con Rajoy, con Sánchez... e, como non, co noso alcalde Evencio.

   Lémbrome dunha viñeta. Foi Feijoo visitar un instituto e di a profesora de física:

  - Manuel! Fálame da gravidade de Newton.

  - Señorita, como lle vou  falar se nen sequera sabía que estivese enfermo.

  - Dáse de conta, Sr. Feijoo, o que son os recortes?

  - Non sabía que os recortes en sanidade tiveran que ver coa saúde deste señor.

  Cando vin o sinal de 20 diante da igrexa fixen esta. Eu chamando a Radio Voz falando co alcalde:

  - Sr. alcalde: o outro día ía eu a 20 e adiantoume unha tartaruga. Multarana?

  - Dáme a matrícula.

  O día despois das eleccións mandeille unha mensaxe ao Sr. alcalde:

  - Sr. alcalde: é imposible acadar tantos votos facendo campaña a 30 por hora. Vostede tivo que andar a 200.

  Eu vin avisando que ía  pasar o que debía pasar. Era visto... Evaristo. Onte ás vinte horas un peón atropelou un coche. O coche, un Opel Astra con matrícula 4654 BCD, está ingresado na unidade de coidados intensivos de Talleres Ledo.

  Que conste que lle teño moito aprecio a Evencio e el a min... tamén mo tiña.